Leiargruppa i avdeling for humanitær og heilskapleg innsats er klar

Frå og med august overtek Norad nye, store forvaltingsoppgåver frå Utanriksdepartementet etter at Regjeringa i fjor vedtok å gje Norad større ansvar for forvaltinga av norsk bistand. Norad skal for første gong forvalte humanitær bistand. Til no har dette ansvaret lege hos Utanriksdepartementet.  

Avdeling for humanitær og heilskapleg innsats skal forvalte over 7 milliardar kroner, og blir leidd av avdelingsdirektør Erik Abild. Avdelinga vil bestå av to seksjonar; seksjon for humanitær innsats og seksjon for førebygging og stabilisering. No er det klart kven Abild får meg seg i leiargruppa i den nyoppretta avdelinga. 

Monica Svenskerud er tilsett som underdirektør i avdelinga. Ho skal mellom anna hjelpe avdelingsdirektøren med koordinering av strategiske og operative prosessar og leie staben som består av medarbeidarar med forvaltingsfagleg-, økonomisk- og juridisk spisskompetanse.  Svenkerud kjem frå stillinga som underdirektør i seksjon for humanitære spørsmål i Utanriksdepartementet (UD) og har sidan januar i år hospitert i Norad som prosjektleiar for etableringa av den nye seksjonen for humanitær innsats. Monica har lang og brei erfaring med både langsiktig og humanitær bistand, og dessutan bilateralt og multilateralt arbeid frå ulike stillingar i Utanriksdepartementet dei siste 20 åra. Ho har òg jobba med langsiktig utviklingssamarbeid ved ambassaden i Dar es Salaam, Tanzania og vore nestleiar ved ambassaden i Colombo, Sri Lanka.  

– Eg gler meg veldig til å jobbe saman med flinke medarbeidarar i avdelinga og bidra til at Norad-UD-reforma blir ein suksess. Dette er eit fint høve til å tenkje nytt og jobbe strategisk med å effektivisere forvaltinga og få til ein meir heilskapleg innsats. Eit tett og nært samarbeid med UD vil vere heilt avgjerande for å få dei ønskte resultata av reforma, seier Svenkerud.

Seksjon for humanitær innsats 

Stine Horn er tilsett som leiar for seksjon for humanitær innsats. Ho er i dag underdirektør i Utanriksdepartementet. Horn har mange års erfaring med humanitært arbeid frå ulike stillingar i Utanriksdepartementet, som direktør for partnarskap og utvikling i NORCAP (Flyktninghjelpen), som landsdirektør i Norsk Folkehjelp i Libanon og som nestleiar ved ambassaden i Beirut.  

– Eg gler meg til å ta fatt på oppgåva som leiar for Norad sin nye seksjon for humanitær innsats. Norsk humanitær innsats skal redde liv, lindre naud og ta vare på menneskeverdigheita og rettar i kriser. Eg går til jobben med stor ansvarskjensle i ei tid der dei humanitære behova aukar drastisk. I seksjonen skal vi setje behova til menneske ramma av kriser i sentrum og respondere i tråd med dei humanitære prinsippa. I samarbeid med partnarar skal vi bidra til å finne løysingar som fremjar innovasjon, lokalt leidd respons og heilskapleg innsats, seier Horn. 

Seksjon for førebygging og stabilisering 

Gunvor W. Skancke er tilsett som leiar for seksjon for førebygging og stabilisering. Ho kjem frå stillinga som fungerande avdelingsdirektør i avdeling for partnarskap og omfordeling i Norad. Ho har lang erfaring frå ei rekkje ulike stillingar i Norad og Utanriksdepartementet. Skancke har mellom anna jobba som bistandsråd ved dei norske ambassadane i Sør-Sudan og Kenya/Somalia, der det meste av arbeidet var retta mot stabilisering i særleg sårbare situasjonar.  

– Verdsbiletet fortel oss med store bokstavar om veksande behov for innsatsar som bidreg til førebygging og stabilisering. Når konfliktar og sårbare situasjonar aukar, blir liva til menneske verre og fattigdomsreduksjonen går i revers.  Derfor er førebygging så viktig. Eg gler meg til å leie ein seksjon med dyktige medarbeidarar som skal jobbe både breitt og djupt med eit mangfald partnarar i ulike land og globalt både for å redusere fattigdom og styrkje førebyggings- og stabiliseringsinnsatsar. Vi skal bruke ekspertisen vår til å forvalte midlar godt og til å gje kloke faglege råd, seier Skancke.