Betre rammevilkår for næringsutvikling i utviklingsland

Privat næringsliv i dynamiske og konkurransebaserte marknader er ei viktig drivkraft for innovasjon, investering og økonomisk vekst. Dårlege rammevilkår er ofte ei avgrensing for næringslivet i utviklingsland. Noreg stør tiltak for å forbetre desse og dermed fremje jobbskaping og stabil inntekt for dei fattigaste. Tiltak blir m.a. retta mot betre tilgang til både finansiell og menneskeleg kapital, teknologi og marknader. 

Norad sitt arbeid med rammevilkår for næringsutvikling 

Arbeidet med å forbetre rammevilkåra for næringsutvikling inneber eit breitt spektrum av tiltak retta mot å skape betre føresetnader for næringslivet i utviklingsland og sikre velfungerande og opne marknader. Hovudområda for støtta er: 

• Reformarbeid og reguleringar: Støtte til policy dialog via multilaterale organisasjonar og reformer som forbetrar forretningsklimaet, medrekna vidareutvikling av juridiske rammeverk og reguleringar på sektor- og overordna nivå som fremjar openheit og rettferdig konkurranse. 
• Infrastruktur: Betre tilgang til økonomisk infrastruktur som t.d. energi og telekommunikasjon. 
• Kapasitetsbygging og betre tilgang til fagkvalifisert arbeidskraft og teknologi.  Opplæring og utvikling av lokal kompetanse og bruk av meir produktiv teknologi for å styrkje evna næringslivet har til å konkurrere og vekse. 
• Tilgang til kapital, både i lokal og utanlandsk valuta: Forbetre moglegheitene for tilgang til kreditt og anna finansiering (eigenkapital), spesielt for små og mellomstore bedrifter. Avgrensa risiko for kurssvingingar ved lån i utanlandsk valuta. 

Utviklingsland møter store utfordringar knytte til næringsutvikling pga. forholdsvis dårlege rammevilkår for næringsutvikling. Godt tilrettelagde rammevilkår for næringslivet er essensielle for å sikre økonomisk vekst som inkluderer dei fattigaste og bidreg til berekraftig utvikling. Utan tilstrekkelege reformer og støtte, vil det vere vanskeleg å tiltrekkje investeringar, stimulere til innovasjon og skape arbeidsplassar. Der er ei rekkje utfordringar i rammevilkåra som avgrensar utviklinga av det lokale næringslivet i fattige land: 

• Manglande infrastruktur som t.d. dårleg tilgang til energi, transport og andre nødvendige infrastrukturar hindrar økonomisk aktivitet. 
• Ustabile reguleringsmiljø med mangelfulle og inkonsekvente regelverk og lover og dessutan til tider uføreseielege forhold skaper uvisse og skremmer investorar frå å investere. 
• Avgrensa tilgang til kapital: Fleirtalet av bedrifter i mange utviklingsland manglar nødvendig finansiering for å vekse og utvikle seg. Spesielt små og mellomstore bedrifter (som i mange utviklingsland står for minst ¾ av sysselsetjinga) får ofte ikkje kreditt frå bankar eller kan ikkje få utskrive obligasjonslån (framandkapital), og det er lite utvikla marknader lokalt for å hente inn kapital til bedrifta ved å skrive ut aksjar (eigenkapital). Utviklingsland er svært ofte sårbare for valutakurssvingingar på lån i utanlandsk valuta, og delvis skjerming av valutakursrisikoen bidreg til å betre rammevilkåra for lokale bedrifter og andre låntakarar. 
• Svakt utdanningssystem og mangel på fagkvalifisert arbeidskraft avgrensar potensialet og opptaket av ny, meir produktiv teknologi i næringslivet. 

For å bidra til forbetra rammevilkår for næringsutvikling samarbeider Norad med og gjev finansiell støtte til ei rekkje fleirgjevarfond, program og prosjekt som då blir implementerte i utviklingsland av organisasjonane som får tilskot. Slikt samarbeid kan vere med styresmakter og næringslivsaktørar i utviklingsland som er sentrale for rammevilkåra til næringslivet, eksempelvis stiftingar, nærings-/industriorganisasjonar, handelskammer, og offentlege institusjonar, og med norske og internasjonale bedrifter og organisasjonar, spesielt multilaterale organisasjonar innanfor Verdsbankgruppa og FN-systemet. I tillegg til betring av overordna (ofte nasjonale) rammevilkår gjev Noreg òg støtte for å fremje konkurransekrafta av individuelle verdikjeder og deira sektorspesifikke, bedriftsnære rammevilkår. Dette er i form av støtte til strategiske partnarskap med næringslivet basert på konkurransebaserte utlysingar. Desse er ofte eit felles partnarskap mellom ei bedrift og ein sivilsamfunnsorganisasjon der bedrifta sikrar næringslivskompetanse om den spesifikke verdikjeda og flaskehalsar i bedriftsnære rammevilkår og sivilsamfunnsorganisasjonen sikrar eit lokalt nettverk og kompetanse om lokale forhold.  

Til liks med norsk bistand generelt, også med tanke på å betre rammevilkår for næringsutvikling i utviklingsland, blir det prioritert å gje slik bistand til utviklingsland i Afrika sør for Sahara, men også prosjekt i andre regionar blir støtta.  

Kontakt

For meir informasjon, kontakt Seksjon for partnerskap