Heilskapleg seksualitetsundervisning

Heilskapleg seksualitetsundervisning er læreplanbasert undervisning som kjem inn på eit breitt spekter av seksualitet, inkludert rettar og likeverd. Seksualundervisning kan tilbydast barn og unge gjennom utdanning, i både formelle og ikkje-formelle omgjevnader. Seksualitetsundervisning kan inngå som eit tverrfagleg tema, i enkeltfag eller som eige fag. I mange land og kontekstar er det utfordrande å jobbe med heilskapleg seksualitetsundervisning fordi det er eit sensitivt tema som blir utsett for koordinert motstand frå ulike pressgrupper. Det er derfor viktig å jobbe kunnskapsbasert og tilpasse aktivitetane til ulike kontekstar. 

Kva 

Heilskapleg seksualitetsundervisning er læreplanbasert undervisning om kognitive, emosjonelle, fysiske og sosiale aspekt ved seksualitet, som har som mål å gje barn og unge kunnskapar, evner, haldningar og verdiar som gjer dei i stand til å verne om si eiga helse, velferd og verdigheit og utvikle positive relasjonar. Det gjev dei òg ei forståing av korleis deira eigne val påverkar dei sjølve og andre, og korleis dei vernar om sine eigne rettar. Seksualitetsundervisning kan inngå som eit tverrfagleg tema, i enkeltfag eller som eige fag. Heilskapleg seksualitetsundervisning er derfor ein sentral del av støtta til utdanning, fordi ei god utdanning skal førebu barn og unge for framtida. 

Arbeidet med heilskapleg seksualitetsundervisning i skulen består av inkludering av ulike tema i læreplanar, pensum og å utvikle opplegg for opplæring av lærarar slik at dei kan bidra med kunnskapsbasert og kvalitetssikra seksualitetsundervisning i klasseromma. Det er òg viktig å jobbe med heilskapleg seksualitetsundervisning på ein kunnskapsbasert måte. Dette inneber å stø ulike typar studiar, forskingsprosjekt og hente inn gode og kvalitetssikra data slik at ein kan møte den motarbeidande og koordinerte motstanden mot retten til å lære om eigen kropp, seksualitet, kva rettar ein har og korleis ein skal vere mot andre barn og unge. Berekraftsmål 4 seier at elevane skal kunne tileigne seg evner for å fremje menneskerettar, likeverd og bidra til berekraftig utvikling. Dette inkluderer heilskapleg seksualundervisning. 

Kvifor 

Sjølve omgrepet «seksualitetsundervisning» er sensitivt i mange samanhengar og kan gje uheldige assosiasjonar. Termar som «livsferdigheitsutdanning», «familieundervisning» osb. blir derfor ofte brukte på nasjonalt nivå. Ein meir fleksibel bruk av omgrepet kan vere nyttig, men dette medfører òg ein risiko for at omgrepet og disiplinen blir vatna ut. 

Argumenta mot heilskapleg seksualitetsundervisning dreier seg i hovudsak om at dette oppmuntrar til seksuell aktivitet blant unge og at foreldre sjølve bør vere ansvarlege for å utdanne barna sine om temaa som blir dekte av den heilskaplege seksualitetsundervisninga. Det er òg motstand mot at LHBTQ+ (lesbiske, homofile, bifile, transpersonar og queer), likestilling og seksuelle og reproduktive rettar blir dekte i seksualitetsundervisninga. Emne som blir sette på som "kulturelt upassande", kan føre til store kontroversar og reversere framgang. Visse pressgrupper spreier feilinformasjon og hevdar at barn blir opplærte til å bli seksuelt aktive gjennom heilskapleg seksualitetsundervisning. Seksualundervisning er, saman med trygg abort og kjønnsidentitet, eit svært kjenslevart tema i internasjonale forhandlingar, og tilvisingar til omgrepet CSE (comprehensive sexuality education) kan vere problematiske. 

Utviklinga av seksualitetsundervisningsprogram har hatt ein positiv effekt i mange land (UNESCO 2023). Det er viktig at seksualitetsundervisnings-programma er transparente, og at kva skulen prøver å oppnå med slik undervisning og innhaldet som blir undervist om i skulane, er godt forstått. Dette er nødvendig for å sikre støtte i befolkninga i lokalsamfunnet og å inkludere avgjerdstakarar som til dømes politikarar og religiøse leiarar. 

Seksualitetsundervisning kan ha ein positiv effekt på reduksjon av tenåringsgraviditetar og dermed redusere fråfall i skulen som av nasjonale utdanningsstyresmakter kan bli sett på som ei effektiv tilnærming for å forbetre utdanninga til jenter.

Korleis

Hovudkanalane for norsk støtte til seksualitetsundervisning er UNESCO og UNFPA. UNESCO jobbar i hovudsak med seksualitetsundervisning i skulen og UNFPA utanfor skulen. I tillegg stør Norad seksualitetsundervisning gjennom kjernestøtte til fleire multilaterale organisasjonar og fond som til dømes Global Partnership for Education, UNAIDS, Global Financing Facility og Robert Carr fondet for å nemne nokre. Noreg stør òg seksualitetsundervisning gjennom sivilsamfunnspartnarane våre som til dømes Redd barna, Plan, Kirkens Nødhjelp, Sex og Politikk og SAIH.  

Kvar 

Det meste av støtta vår går til land i Afrika sør for Sahara. Vi øyremerkjer ikkje støtte til land, men stør opp om dei strategiane som partnarane våre har. Det er likevel noko støtte via ambassadane, som til dømes støtta til UNESCO i Malawi.  

Lenkjer    

• UNFPA (2020): International Technical and Programmatic Guidance on Out-of-School Comprehensive Sexuality Education (CSE) | United Nations Population Fund (unfpa.org)  
• UNESCO Strategy on Education for Health and Wellbeing: UNESCO strategy on education for health and well-being: contributing to the Sustainable Development Goals; 2016 - 246453eng.pdf  
• UNESCO 2022: Evidence gaps and research needs in comprehensive sexuality education Technical brief 380513eng.pdf   
• UNESCO (2023) nettside om seksualitetsundervisning: https://www.unesco.org/en/health-education/cse 
• UNFPA informasjonsside om seksualitetsundervising: Comprehensive sexuality education (unfpa.org) 
• UNESCO (2018): International Technical Guidance on Sexuality Education. AN evidence-based approach: ITGSE.pdf (unfpa.org)   

Kontakt

For meir informasjon, vennligst kontakt Seksjon for utdanning og forskning.