DREF – Røde Kors og Røde Halvmåne sitt nødhjelpsfond

Difor har Røde Kors- og Røde Halvmånerørsla eit eige globalt nødhjelpsfond: Disaster Response Emergency Fund (DREF).  

Det tek tid å få på plass internasjonal støtte, og DREF gjer det mogleg å setje i gong humanitær hjelp raskt. 

Pengar tilgjengelege når katastrofen råkar 

Det internasjonale forbundet av Røde Kors- og Røde Halvmåneforeiningar (IFRC) styrer DREF frå sekretariatet i Genève. Fondet gjer det mogleg for nasjonale Røde Kors- og Røde Halvmåneforeiningar å søkje om pengar når ein katastrofe eller annan akutt krise oppstår. 

Søknadene blir behandla raskt. Dei kan bli godkjende innan 24 timar, og pengane kan bli utbetalte innan 72 timar. Det gjer at foreiningane kan setje i gang eigne planar og bruke ressursane der behova er størst, utan å vente på nye avtalar om støtte. 

Små og mellomstore kriser 

DREF er særleg viktig ved små og mellomstore kriser som lokale flaumar, jordskjelv og sjukdomsutbrot. Desse krisene får ikkje alltid internasjonal merksemd eller fører til store nødhjelpsappellar.  

DREF støttar òg anticipatory action, varslingsbasert innsats,  der førebuande tiltak blir sette i verk før ei venta katastrofe eller klimahending råkar. Slik kan ein redusere konsekvensane og behovet for humanitær hjelp når krisa først oppstår. 

Når ei krise blir større enn det nasjonale styresmakter og den nasjonale foreininga kan handtere åleine, kan IFRC mobilisere større ressursar gjennom ein eigen nødhjelpsappell. DREF kan òg gi den første finansieringa medan ein større internasjonal innsats blir bygd opp. 

Når ein katastrofe råkar, er den nasjonale Røde Kors- eller Røde Halvmåneforeininga ofte blant dei første som reagerer. Foreiningane har lokale nettverk og frivillige over heile landet, og kjenner områda og lokalsamfunna dei arbeider i.  

I nokre kriser kan nasjonalforeiningane òg vere blant dei få humanitære aktørane som har tilgang til område der det er vanskeleg for andre organisasjonar å operere. DREF-støtta byggjer derfor på foreiningane sine eigne vurderingar av behov og prioriteringar. 

Noreg stor givar 

DREF vart oppretta i 1979 og er i dag ein viktig del av beredskapen til Røde Kors- og Røde Halvmånerørsla for rask humanitær hjelp. 

Noreg er ein av dei største givarane til DREF og gir om lag 50 millionar kroner i året til fondet. Noreg har inngått ny avtale med DREF for perioden 2026–2028. Den langsiktige støtta gjer det mogleg å halde oppe ein beredskap som raskt kan setjast inn når katastrofar og andre akutte kriser oppstår. 

Sidan 2020 har DREF bidratt til å nå rundt 80 millionar menneske som er råka av katastrofar og kriser. 

Større humanitær beredskap 

DREF er éin av fleire måtar som gjer det mogleg å reagere raskt når ei krise oppstår. 

Fondet utfyller mellom anna støtte frå givarland, FN, andre humanitære fond og dei andre ressursane i Røde Kors- og Røde Halvmånerørsla. 

Ein viktig skilnad er at DREF gjer det mogleg å sende pengar direkte til nasjonale Raude Kors- og Raude Halvmåneforeiningar som alt er til stades i områda som blir råka. Dette gjer at finansieringa kan nå lokale aktørar raskt, utan at det først må etablerast ein større internasjonal respons.   

God humanitær beredskap handlar ikkje berre om å ha frivillige og hjelpearbeidarar klare. Det handlar òg om å ha pengar som kan løysast ut raskt og brukast av aktørar som alt er på plass og kan gi hjelp i dei første avgjerande timane og dagane etter at ei krise råkar.