FNs naudhjelpsfond gjer det mogleg å reagere raskt når ei humanitær krise blir verre.
Martin Samuelsen
Seksjonsleiar for humanitær innsats
Jemen: Alvorleg svolt og underernæring
Saeedah Mohammed (65) kokar treblad til barnebarna sine utanfor eit provisorisk telt i Al-Manij-leiren nær Taez sørvest i Jemen 21. mai 2026.
Den humanitære krisa i Jemen blir stadig verre. FN melder at over halvparten av innbyggjarane i landet er i akutt fare for matmangel.
FNs naudhjelpsfond, Central Emergency Response Fund (CERF), har løyvd 10 millionar amerikanske dollar til livreddande innsats i landet. Krisa veks samstundes som den internasjonale støtta har gått mykje ned dei siste åra.
- 18,2 millionar menneske, det vil seia halvparten av alle innbyggjarane i Jemen er i akutt fare for ikkje ha nok mat.
- Av denne halvparten er 5,5 millionar i ein så alvorleg situasjon at matmangelen truar helsa og livsgrunnlaget.
- Over 2,2 millionar barn under fem år står i fare for akutt underernæring.
- 1,3 millionar gravide og ammande kvinner står i fare for akutt underernæring.
Den nye løyvinga frå FNs naudhjelpsfond skal betre den livreddande innsatsen til FN og partnarane i områda der behova er størst. Pengane skal mellom anna gå til kontantstøtte, behandling av akutt underernæring, helsehjelp og tiltak for vatn, sanitær og hygiene (WASH).
Noreg er ein av dei største givarane
Noreg er ein av dei største bidragsytarane til FNs naudhjelpsfond og finansierer om lag ti prosent av fondet.
– Fleksibel finansiering er avgjerande for at hjelpa kan nå fram til menneske med dei største behova når det hastar, seier Martin Samuelsen, seksjonsleiar for humanitær innsats i Norad.
FNs globale naudhjelpsfond blir brukt både ved nye katastrofar og i langvarige kriser som får for lite støtte. Fondet gjer det mogleg å setje i gang livreddande innsats utan å måtte vente på nye rundar med finansiering.
Jemen er rekna for å vere den nest største humanitære krisa i verda etter Sudan. Årsaka til krisa er den langvarige konflikten mellom styresmaktene i Jemen og opprørarar frå Houthi-rørsla. Houthiane er støtta av Iran.