Norsk bistand i tal

Bistandsresultater.no

Portalen Bistandsresultater.no gjev informasjon om kvar og korleis bistandspengane blir brukte og resultata som blir oppnådde. 

Her finn du offisiell statistikk over bruk av norske bistandspengar, fordelt geografisk og på sektorar og partnarar. Portalen gjev også resultatinformasjon gjennom vurderingar av framdrift og resultat av bistandsprosjekt, resultatforteljingar og tematiske rapportar.

• Statistikken følgjer rapporteringa til OECD – Organisasjonen for økonomisk samarbeid og utvikling.
• Resultatinformasjonen i portalen er produsert av Norad, Utanriksdepartementet og norske ambassadar.

Bistandsstatistikken gjev oversikt over norsk bistand til utviklingsland frå 1960 til siste rekneskapsår.

Tall som teller

I ei verd prega av krig og konflikt, er dei humanitære behova enorme, og ein stadig større del av norsk og internasjonal bistand går til konfliktramma land. På Tal som tel-arrangementet presenterer Norad den offisielle norske bistandsstatistikken for 2024.   

Se arrangementet Tall som teller 

Les meir i rapporten Tal som tel - Statistikk over norsk utviklingsbistand i 2024.

Kva gjekk norsk bistand til i 2024?

55,7 milliardar kroner i norsk bistand

Norsk bistand vart redusert med 2,9 milliardar kroner i løpande prisar frå 2023, ein nedgang på 5 prosent (4 prosent i faste prisar). Likevel var bistandsnivået det nest høgaste historisk, både i løpande og faste prisar. Internasjonal bistand frå OECD DAC-land fall med 7 prosent, i faste prisar.

1,02 prosent av bruttonasjonalinntekt

Noreg var det største gjevarlandet målt som del av BNI og var blant dei fire landa som nådde FN-målet om minst 0,7 ODA/BNI-prosentandel. Målt i beløp (USD) var Noreg det niande største gjevarlandet, medan USA var det største, og stod for 30 prosent av den samla bistanden frå OECD DAC-land.

Europa er største mottakarregion

Bistand til Ukraina gjorde Europa til den største mottakarregionen i 2024, med 10,1 milliardar kroner i bistand. Europa passerte dermed Afrika, som mottok 8,4 milliardar, som var lågare enn i 2023, men høgare enn tidlegare år. Ukraina var den suverent største mottakarlandet og fekk 9,3 milliardar kroner.

10,2 milliardar kroner til naudhjelp

Naudhjelp utgjorde 10,2 milliardar kroner, tilsvarande 18 prosent av den totale bistanden. Det var ein reduksjon i beløp og prosentdel, hovudsakleg fordi eittårig støtte i 2023 til land ramma av Ukraina-krigens ringverknader fall bort (Sørpakka). Nivået var likevel betydeleg høgare enn i åra før 2023.

Mindre til dei fattigaste landa

Bistand til dei fattigaste landa (minst utvikla land og andre låginntektsland) fall med 2,3 milliardar kroner. Samtidig gjekk prosentdelen av landspesifisert bistand til desse landa ned frå 40 til 31 prosent. Dette skuldast hovudsakleg at Sørpakka fall bort og auka bistand til andre land.

Dei ti største mottakarlanda av norsk bistand i 2024

1. Ukraina
2. Palestina
3. Indonesia
4. Brasil
5. Etiopia
6. Sør-Sudan
7. Afghanistan
8. Tanzania
9. Sudan
10. Mosambik

Les pressemeldinga: Historisk nedgang i bistand internasjonalt