Dette støttar den norske bistanden til likestilling
UNGEI (i regi av UNICEF) og samarbeidspartnarane deira i Uganda har som mål å få unge mødrer som har slutta på skulen på grunn av graviditet, tilbake til undervisninga.
Norad har som mål å medverke til at kvinner og menn har like rettar, moglegheiter og innverknad i samfunnslivet. Gjennom norsk bistand støttar Norad tiltak som styrkjer kvinners og jenters vern mot vald, tilgang til seksuell og reproduktiv helse og rettar, tilgang til utdanning og arbeid, samt deltaking i politikk og næringsliv. Innsatsen er særleg retta mot land og regionar der likestillingsutfordringane er store.
Norsk innsats på likestillingsfeltet
Norsk bistand på likestillingsfeltet omfattar mellom anna politisk deltaking, økonomisk sjølvstende, kamp mot kjønnsbasert vald og seksuell og reproduktiv helse og rettar (SRHR).
Arbeidet med politisk deltaking har som mål å redusere barrierane for kvinners deltaking og styrkje påverknadskrafta deira, mellom anna gjennom støtte til valdeltaking og kvinneorganisasjonar.
For å auke kvinners økonomiske sjølvstende støttar Noreg tiltak som fremjar kvinners tilgang til utdanning, arbeid, sosiale sikkerheitsnett og økonomiske ressursar, samt støtte til lovgjeving som sikrar like rettar.
Kampen mot kjønnsbasert vald omfattar både førebygging og støtte til overlevande gjennom helsetenester, juridisk bistand og psykososial støtte. Støtte til lokale kvinneorganisasjonar er òg ein viktig del av dette arbeidet.
Bistanden har òg som mål å sikre tilgang til prevensjon, trygg abort, seksualitetsundervisning, trygge graviditetar og fødslar, førebygging og behandling av seksuelt overførbare sjukdommar og hiv og heilskaplege helsetenester for alle, inkludert ungdom og sårbare grupper som LHBT+-personar. Styrking av helsesystem slik at primærhelsetenesta har ein heilskapleg tilnærming til SRHR for alle er noko Noreg jobbar for.
Global innsats med fokus på Afrika sør for Sahara
Noreg sin innsats for SRHR støttar arbeid og programmer over hele verda, og med særleg prioritering av land i Afrika sør for Sahara og land med humanitære kriser.
Det er en prioritet å støtte nasjonale og lokale pådrivarorganisasjonar i det sivile samfunnet som er leia av kvinner og ungdom. Det er òg ein prioritet å bidra til auka kapasitet hos nasjonale styresmakter.
Kven samarbeider Norad med på likestillingsfeltet?
For å oppnå varige resultat samarbeider Norad med eit breitt spekter av partnarar.
Viktige partnarar er multilaterale organisasjonar som FN, utviklingsbankar, sivilsamfunnsorganisasjonar, lokale sivilsamfunnsorganisasjonar og kvinneleiande grupper.
Norad støttar òg nasjonale styresmakter i å utvikle og gjennomføre ikkje-diskriminerande lovverk og politikk, som del av ei brei og integrert tilnærming til likestilling.
Ein meir strategisk bruk av norske bistandspengar
Norsk innsats for Seksuell og reproduktiv helse og rettar er organisert som ein portefølje. Porteføljestyring skal sikre ein kunnskapsbasert og strategisk bruk av norske bistandspengar, for å oppnå måla i utviklingspolitikken. Les meir om korleis Norad arbeider med porteføljestyring.