Dette støtter norsk bistand på klima-, mat-, miljø- og energiområdet

Norsk bistand støttar bevaring og berekraftig bruk av naturressursar 

Norsk bistand bidreg til å bevare og bruke naturressursar berekraftig, med støtte til lokalsamfunn, næringsutvikling og tiltak mot miljøkriminalitet. Midla går til styrking av naturforvaltning, gjennomføring av lokale naturmangfaldsplanar og utvikling av grøne arbeidsplassar. 

På energiområdet støttar Noreg ei rekkje tiltak som både betrar tilgangen til energi, reduserer klimagassutslepp og styrkjer klimatilpassinga. Noreg fremjar òg utbygging av fornybar energi som sol, vind og vasskraft. Bistanden spelar òg ei viktig rolle i å mobilisere privat kapital til grøn omstilling. 

Gjennom klima- og skogsatsinga NICFI og innsatsen for berekraftig havforvaltning finansierer Noreg tiltak som reduserer avskoging, vernar marine økosystem og sikrar berekraftig fiskeri og akvakultur. 

Ein del av bistanden går òg til innovasjon. Til dømes støtter Norad FSD Africa, som bidrar til å utvikle nye måtar å finansiere klimatilpassing i afrikanske land. I staden for tradisjonell prosjektstøtte handlar dette om å skape nye verktøy i finansmarknaden, slik at meir privat kapital kan gå til klimatilpassing, naturbaserte løysingar og grøne jobbar. 

Kva geografisk nedslagsfelt har bistanden innanfor klima, mat, miljø og energi? 

Den norske bistanden til natur, økosystem og klima er global. Når det gjeld skog, er innsatsen særleg retta mot tropiske skogland i Asia, Afrika og Latin-Amerika gjennom klima- og skoginitiativet. Prosjekt for å ta vare på naturmangfald blir støtta i land som Indonesia, Brasil, Peru, Guyana, DR Kongo og Colombia, i samarbeid med store miljøfond og sivilsamfunnsorganisasjonar. 

Hovudfokuset for Norad sin energibistand ligg på Afrika sør for Sahara. Norad samarbeider mellom anna med utviklingsbankar, norske fagdirektorat og private bedrifter. Bistand som skal bidra til berekraftige matsystem og styrkt matsikkerheit går i hovudsak til land i Afrika sør for Sahara.  

Ein meir strategisk bruk av norske bistandspengar  

Den norske bistanden til natur, økosystem og klima er organisert i fem porteføljar: Hav, Rein Energi, Skog, Natur og klima og Matsystem. Porteføljestyring skal sikre ein kunnskapsbasert og strategisk bruk av norske bistandspengar, for å oppnå måla i utviklingspolitikken. Les meir om korleis Norad arbeider med porteføljestyring.