Norsk støtte til humanitær og heilskapleg innsats

Målet er å redde liv, lindre naud og ta vare på menneskeverd og rettar i krise og konflikt.  

Humanitær innsats er akutt naudhjelp, men også andre typar krisehjelp som:  

• Arbeid for vern av sivile og menneskerettar 
• Psykososial støtte til barn og vaksne 
• Arbeid for å få på plass igjen skular, helsetenester og forsyning av vatn  
• Førebygging og beredskap i sårbare område 

Vi har plikt til å hjelpe menneske i naud, uavhengig av kven dei er og kvar dei bur. Denne plikta spring ut av det humanitære imperativet.  

Heilskapleg innsats 

Kriser skjer sjeldan åleine. Derfor skal den norske innsatsen omfatta både akutt naudhjelp og langsiktig arbeid med utvikling og fred. Dette kallar vi heilskapleg innsats.  

Humanitære kriser skjer ofte i sårbare samfunn med konflikt, fattigdom og svakt styresett, eller på grunn av klimaendringane. Målet med den heilskaplege innsatsen er at den møter akutte behov og styrkjer samfunn på lengre sikt. 

Dei siste åra har dei humanitære behova auka kraftig. Det er særleg fordi:  

• Det har blitt fleire og meir langvarige væpna konfliktar 
• Klimaendringane utløyser og forsterkar kriser 
• Tryggleiken og beredskapen er svak i det vi kallar sårbare statar 

Lokale og internasjonale partnarar skal stola på at den norske støtta er rask, fleksibel og langsiktig.  

Internasjonalt samarbeid - avgjerande for all humanitær innsats 

Norad samarbeider med ei rekke FN-organisasjonar, Den internasjonale raudekross- og raude halvmånerørsla, og andre frivillige organisasjonar for å sikre at hjelpa når raskt fram og blir brukt der ho trengst mest. Noreg skal vere ein tydeleg og leiande humanitær aktør. 

Støtta skal byggje på kunnskap, analysar og dokumenterte resultat, med tydelege krav til kvalitet, læring og effekt. 

Noreg legg vekt på lokale aktørar, lokal kunnskap og løysingar som varer. 

Hjelpa skal gå dit nauda er størst. Ei viktig rettesnor er responsplanane til FN. Planane sikrar at dei ulike partnarane når dei som treng hjelpa mest. Politiske prioriteringar legg også føringar for kven som får støtte.  

Dei største mottakarane av norsk humanitær innsats er Ukraina, Sudan og Palestina.