Fornybar energi: Garantiordning i Amazonas

Garantiane vil gi nær 8 milliardar kroner til investeringar i fornybar energi i område med stor energifattigdom gjennom Den interamerikanske utviklingsbanken. 

 – Vi er stolte over å kunne annonsere den første garantien til den norske statsgarantiordninga, og ekstra fint er det at vi gjer dette i lag med Danmark og Sverige. Noreg har aktivt arbeid for å bevare regnskogen i Amazonas i 15 år, og regionen er ekstremt energifattig, seier Norads direktør Gunn Jorid Roset. 

Den norske garantien på 50 millionar dollar går inn i ein samla garanti på 200 millionar dollar. Sverige bidrar med 50 millionar og Danmark med 100 millionar. Garantien avlastar risiko for Den interamerikanske utviklingsbanken (IDB) på tvers av fleire land og bidrar til at banken får betre kapasitet til å gi nye lån til fornybare energiprosjekt.   

For kvar dollar i garanti kan IDB auke utlåna sine nesten fire gonger. Det betyr at den norske garantien aleine gjer det mogleg å investere om lag 2 milliardar kroner i fornybar energi. Minst 60 prosent av desse pengane skal gå til Amazonas-regionen. Resten av pengane blir fordelte i sentral-Amerika i område med mangel på energi og stort behov for utvikling.  

Tiltaket støttar programma «Amazonia Forever» og «America en el Centro», som siktar mot å bidra til rettferdig grønn utvikling i regionen. Dette svarar også direkte på målet til garantiordninga om klimafinansiering, auka energitilgang til låginntektsgrupper og kutt i klimagassutslepp. 

Les også saken og se filmen: Står sammen mot ulovlige gullgruver i Amazonas