Tilskotsordningar for det humanitære bistands- og utviklingssamarbeidet til norske og internasjonale frivillige aktørar : retningslinjer

Samarbeidet som fell inn under desse retningslinjene, omfattar både humanitært hjelpearbeid på kort og mellomlang sikt, støtte til freds- og forsoningsprosessar, menneskerettar og demokratiutvikling og langsiktig utviklingssamarbeid.

Ordningane tar primært sikte på å styrkje det sivile samfunn som drivkraft og endringsagent for å nå nasjonale og internasjonale utviklingsmål. Med "det sivile samfunn" meiner ein her dei formelle og uformelle nettverk som er verksame i spennet mellom stat og familie. Bistand retta mot det sivile samfunn omfattar ikkje berre aktørar, men òg rammevilkår, møteplassar og samhandling som gjev aktørane påverknadsmoglegheiter og handlingsrom. Norske frivillige organisasjonar og aktørar har særleg gode føresetnader i samarbeidet med sivile samfunn i utviklingsland, i eigenskap av den rolla dei spelar i norsk samfunnsutvikling.